About ProjectKawata138

000/138

[New project]
畢業搵正職前想做一件難忘嘅事，一件未做過又覺得好難嘅事，就係想試下跟住一本書整哂入面嘅所有蛋糕。一方面可以有個機會練習多啲，另一方面又可以俾好心急嘅自己去嘗試慢慢耐心地達成一件事。

揀咗呢本《河田勝彥的法國鄉土甜點之旅》La Belle Histoire de Gâteaux Provençaux，原因係想試下整法國鄉土甜點。相比而家常見嘅法式甜點，雖然無咁fancy，全部都係啡啡黃黃好raw好純樸咁，但咁樣應該可以嘗試多啲唔同嘅技巧，又可以試下整到更加多種類嘅甜點，更加接近法式甜點嘅「原點」。

本書係依照地區去寫每個地方嘅傳統鄉土甜點。根據河田主廚當年遊歷法國嘅順序，順時針方向一共分開十個章節，每個站都有唔同大區、城市，希望整完之後會好似去咗趟法國旅行啦！

將書中所有食譜都大概睇一次之後，會發現每個都有自己嘅常用食材(例如某種水果)，又或者經常出現某種類嘅甜點(好流行撻類/糖果類)，於是，又可以從中了解到唔同地區嘅人嘅習慣、節慶、盛產嘅食材，氣候，種種都會令到佢地喜好/出產某樣甜點，引證以前聽講過嘅「從飲食文化了解一個地方的文化、氣候、地理」。

雖然話係傳統鄉土甜點，但河田主廚都有係部分食譜上作出改良，做出自己嘅版本，例如用傳統做法以外嘅麵團、加入蜂蜜增添風味。而因為部分材料太罕有，所以盡力係香港搵都係搵唔到嘅話，我都係會搵一啲替代品嘅。

其實一共有138樣，究竟整唔整得哂我都唔知lol

(12/7/2018 從Instagram搬運及修改此文)

Recipe/Reference from
La Belle Histoire de Gâteaux Provençaux
「オーボンヴュータン」河田勝彦のフランス郷土菓子
《河田勝彥的法國鄉土甜點之旅》
#TDB_KWT_000 #tdbProjectKawata138 #tdbPâtisserieTraditionnelle